අප්‍රිකාවේ සැබෑ විශාලත්වය පෙන්වන නව ලෝක සිතියමක් ළඟදීම භාවිතයට!

නිව්යෝර්ක්, එක්සත් ජාතීන්ගේ සංවිධානය —

අප්‍රිකානු මහද්වීපයේ සැබෑ භූමි ප්‍රමාණය වඩාත් නිවැරදිව හා යථාර්ථවාදීව නිරූපණය වන පරිදි සකස් කරන ලද නව ලෝක සිතියමක් භාවිතයට ගැනීම සඳහා වූ විශේෂ යෝජනාවක් එක්සත් ජාතීන්ගේ මහා මණ්ඩලයේදී නිල වශයෙන් සම්මත වී තිබේ. ටෝගෝ රාජ්‍යය විසින් ඉදිරිපත් කරන ලද මෙම යෝජනාව සඳහා අප්‍රිකානු සංගමයේ පූර්ණ සහාය හිමි වූ අතර, ප්‍රංශය සහ බ්‍රිතාන්‍යය ඇතුළු ලෝකයේ රටවල් 164ක් මීට පක්ෂව ඡන්දය ප්‍රකාශ කර ඇත. කෙසේ වෙතත්, මෙම යෝජනාවට එරෙහිව ඡන්දය ප්‍රකාශ කළ එකම රට අමෙරිකාව වන අතර, තවත් රටවල් 6ක් ඡන්දය දීමෙන් වැළකී සිටියේය.

වසර 1569 දී ෆ්ලෙමිෂ් ජාතික සිතියම් ශිල්පී ජෙරාඩස් මර්කේටර් විසින් නිර්මාණය කරන ලද සාම්ප්‍රදායික ‘මර්කේටර් සිතියම’ (Mercator projection) වසර සිය ගණනක් තිස්සේ ලොව පුරා භාවිත කර ඇතත්, එයින් අප්‍රිකාවේ සැබෑ විශාලත්වය දැඩි ලෙස විකෘති වන බවට දිගු කලක සිට විවේචන එල්ල විය. එම පැරණි සිතියම මඟින් ග්‍රීන්ලන්තය සහ අප්‍රිකාව සමාන ප්‍රමාණවලින් පෙන්වූවද, සැබවින්ම අප්‍රිකාව ග්‍රීන්ලන්තයට වඩා 14 ගුණයකින් විශාලය. ගෝලාකාර පෘථිවි පෘෂ්ඨයක් ද්විමාන (2D) පැතලි සිතියමක ඇඳීමේදී ස්වභාවිකවම සිදුවන මෙම විකෘතිය නිවැරදි කිරීම සඳහා, 2018 වසරේදී සිතියම් විද්‍යාඥයින් පිරිසක් විසින් ‘Equal Earth’ නමැති නව සිතියම් ප්‍රක්ෂේපණයක් නිර්මාණය කරන ලදී. පසුගිය පෙබරවාරි මාසයේදී අප්‍රිකානු සංගමයේ සාමාජික රටවල් 54 විසින් එය නිල වශයෙන් පිළිගත් අතර, අමෙරිකාව, චීනය, ඉන්දියාව සහ යුරෝපයේ විශාල කොටසක් එකතු කළත් අප්‍රිකානු මහද්වීපය ඊට වඩා විශාල වන බව දත්ත මඟින් තහවුරු වේ. එක්සත් ජාතීන්ගේ මෙම තීරණය නීතිමය වශයෙන් දැඩිව බැඳී නොසිටියද, ලොව පුරා අධ්‍යාපන ක්ෂේත්‍රය, විද්‍යාත්මක ආයතන සහ මාධ්‍ය භාවිත කරන සිතියම් ඉදිරියේදී වෙනස් වීමට මෙය ප්‍රධාන පදනමක් වනු ඇත.