පාස්කු ප්රහාරයේ මහ මොළකරු සුරේෂ් සලේ බව අධිකරණයේදී හෙළිවේ: විමර්ශනවල විශාල පෙරළියක්!
කයිටායා, නවසීලන්තය — දියත නිව්සීලන්ත නිවුස් (Diyatha News New Zealand)
පාස්කු ඉරිදා ත්රස්ත ප්රහාරය පැවැති මැතිවරණයක් ඉලක්ක කරගනිමින්, රාජ්ය බුද්ධි සේවයේ හිටපු ප්රධානී සුරේෂ් සලේ මහතාගේ මෙහෙයවීමෙන් සිදුකර ඇති බවත්, එම ප්රහාරයේ මහ මොළකරු ඔහු බවත් අතිරේක සොලිසිටර් ජනරාල් දිලීප පීරිස් මහතා ඊයේ (20) කොළඹ කොටුව මහේස්ත්රාත් අධිකරණය හමුවේ හෙළිදරව් කළේය.
මෙම අතිශය සංවේදී සහ තීරණාත්මක හෙළිදරව්ව සිදු වූයේ, පාස්කු ප්රහාරයේ විමර්ශන නොමඟ යැවීම සම්බන්ධයෙන් වන චෝදනාවට අදාළ නඩුව කොටුව මහෙස්ත්රාත් පසන් අමරසේන මහතා ඉදිරියේ කැඳවූ අවස්ථාවේදීය.
විමර්ශනවල හැරවුම් ලක්ෂ්යය: ප්රංශයෙන් ලැබුණු සාක්ෂි
අපරාධ පරීක්ෂණ දෙපාර්තමේන්තුව (CID) වෙනුවෙන් කරුණු දැක්වූ අතිරේක සොලිසිටර් ජනරාල් දිලීප පීරිස් මහතා පවසා සිටියේ, මේ වන විට තමන් සතුව පිටු 14ක දීර්ඝ විමර්ශන වාර්තාවක් පවතින බවත්, එය මෙම නඩුවේ හැරවුම් ලක්ෂ්යයක් සනිටුහන් කරන බවත්ය.
“පාස්කු ප්රහාරය සම්බන්ධයෙන් චැනල් ෆෝ (Channel 4) නාලිකාවට ප්රකාශයක් සිදුකළ අසාත් මවුලානා නමැත්තාගෙන් අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර ඇතුළු නිලධාරීන් කණ්ඩායමක් ප්රංශයේදී සාක්ෂි සටහන් කර ගත්තා. ඔහුගේ ප්රකාශයට අනුව, තුවාන් සුරේෂ් සලේ මෙම ප්රහාරයේ මහ මොළකරු වශයෙන් කටයුතු කර තිබෙන බව පැහැදිලියි. මෙය දේශපාලන අවශ්යතාවයක් ඉටුකිරීම සඳහා සිදුකර තිබෙනවා,” යනුවෙන් අතිරේක සොලිසිටර් ජනරාල්වරයා ප්රකාශ කළේය.
සෙයිනි මවුලවී, පිල්ලෙයාන් සහ සුරේෂ් සලේගේ සම්බන්ධය
අතිරේක සොලිසිටර් ජනරාල්වරයා විසින් අධිකරණය හමුවේ ගොනු කළ කරුණු අනුව, මෙම කුමන්ත්රණයේ තිරය පිටුපස සිටි ප්රධාන චරිත අතර සෙයිනි මවුලවී, ‘පිල්ලෙයාන්’ සහ සුරේෂ් සලේ සිටිති.
- සම්බන්ධතාවය: අලියාර් හංදියේ ගැටුමකින් බන්ධනාගාරගත වූ සහරාන් හෂීම්ගේ කල්ලියේ සෙයිනි මවුලවී සහ පිල්ලෙයාන් එකම සිරකුටියක සිට ඇත. සෙයිනි මවුලවී මැරෙන්න සූදානම් පිරිසක් සිටින බව පිල්ලෙයාන්ට පවසයි. මෙම තොරතුර සුරේෂ් සලේට ලැබීමෙන් පසු ඔහු ඔවුන්ගේ සහාය ලබා ගැනීමට කටයුතු කර ඇත.
- පුත්තලම් සාකච්ඡාව: පාස්කු ප්රහාරයට පෙර සහරාන් හෂීම් ඇතුළු ස්වයංඝාතකයන් හයදෙනෙකු පුත්තලමේදී සුරේෂ් සලේ හමුවී සාකච්ඡා කර ඇති බව විමර්ශනවලදී අනාවරණය වී තිබේ.
- දෙහිවල බෝම්බකරු: ප්රහාරය සිදුවූ අවස්ථාවේ සුරේෂ් සලේ විසින් අසාත් මවුලානාට ඇමතුමක් ලබාදී, දෙහිවල බෝම්බකරු වන ජමීල්ව හමුවී ඔහුගේ දුරකථනය භාරයට ගන්නා ලෙස උපදෙස් දී ඇත.
දේශපාලන අරමුණු සහ බලය තහවුරු කර ගැනීම
අතිරේක සොලිසිටර් ජනරාල්වරයා වැඩිදුරටත් චෝදනා කළේ, රාජ්ය ආරක්ෂාව වෙනුවට දේශපාලන පළිගැනීම් සඳහා බුද්ධි අංශ යොදා ගත් බවයි. ගෝඨාභය රාජපක්ෂ ජනාධිපති වී සතියකින් පිල්ලෙයාන්ව නිදහස් කරන බවට රාජපක්ෂ පවුලේ අය ඔහුට පොරොන්දු වී ඇත. පසුව, ගෝඨාභය රාජපක්ෂ ජනාධිපති වූ පසු සුරේෂ් සලේව සමස්ත රාජ්ය බුද්ධි සේවයේම ප්රධානියා ලෙස පත් කර ඇත්තේ බුද්ධි තොරතුරු අනෙක් අංශ වෙත යාම වැළැක්වීමටය.
තවද, ප්රගීත් එක්නැලිගොඩ පැහැරගැනීම, ලසන්ත වික්රමතුංග ඝාතනය ඇතුළු සිදුවීම් ගණනාවකට පිල්ලෙයාන්ගේ කල්ලිය සහ යුද හමුදා බුද්ධි අංශය සම්බන්ධ බවත්, ඔවුන්ගෙන් දෙදහසකට වැඩි පිරිසකට හමුදා බුද්ධි අංශයෙන් වැටුප් ගෙවා ඇති බවත් ඔහු පෙන්වා දුන්නේය.
සුරේෂ් සලේගේ ජීවිත තර්ජන සහ අධිකරණ තීන්දුව
සුරේෂ් සලේ මහතා අධිකරණය හමුවේ ප්රකාශයක් ලබා දීමට අවසර ඉල්ලා සිටියද, අතිරේක සොලිසිටර් ජනරාල්වරයා ඊට දැඩි ලෙස විරුද්ධ විය. “ඔහුගේ ජීවිතයට තර්ජන එල්ල වී තිබෙනවා. මෙය ඔහුට වේදිකාවක් කරගන්න ඉඩ දිය නොහැකියි. මෙය විමර්ශනය අඩාළ කිරීමේ උත්සාහයක්” යැයි ඔහු පැවසීය.
සැකකාර සුරේෂ් සලේ අධිකරණයට ඉදිරිපත් නොකරන ලෙසත්, ඔහුගේ ප්රකාශ ලබා ගැනීමේ ඉල්ලීම පිළිබඳව ජූලි 1 වනදා නියෝගයක් ලබා දෙන බවත් මහෙස්ත්රාත්වරයා ප්රකාශ කළේය. එතෙක් ඔහු රැඳවුම් නියෝග මත තබා ගැනීමට නියම විය.
නාමල් රාජපක්ෂගේ ප්රතිචාරය
අධිකරණයේදී සිය නම සඳහන් වීම සම්බන්ධයෙන් පාර්ලිමේන්තු මන්ත්රී නාමල් රාජපක්ෂ මහතා ‘X’ පණිවිඩයක් නිකුත් කරමින් ප්රකාශ කළේ තමන් පිල්ලෙයාන් බැලීමට ගියේ රහසක් ලෙස නොව නිල වශයෙන් බවයි. “මේවා දේශපාලන නාට්ය සහ මාධ්ය සංදර්ශන. අප ඕනෑම සාධාරණ පරීක්ෂණයකට මුහුණ දීමට සූදානම්,” යනුවෙන් ඔහු සඳහන් කර තිබුණි.
පාස්කු ප්රහාරයේ වින්දිතයන්ට සහ ඔවුන්ගේ පවුල්වලට සාධාරණය ඉටු කිරීම වෙනුවට, රජය මෙම ඛේදවාචකය දේශපාලන ඉලක්ක කරා යොදා ගන්නා බවට ඔහු චෝදනා කළේය.
