අග්රාමාත්ය ක්රිස්ටෝෆර් ලක්සන් විපක්ෂයේදී කළ විවේචන අමතක කරමින් පැසිෆික් සංචාරය සඳහා දෙවන ගුවන් යානයක් යොදා ගැනීම සාධාරණීකරණය කරයි!
වෙලින්ටන් සහ පලාවු —
පැසිෆික් දූපත් සංසදයේ (PIF) වාර්ෂික නායකයන්ගේ හමුව සඳහා පලාවු (Palau) වෙත ගමන් කළ අග්රාමාත්ය ක්රිස්ටෝෆර් ලක්සන් (Christopher Luxon), ආරක්ෂක හමුදාවට අයත් දෙවන ගුවන් යානයක් (back-up plane) යොදා ගැනීම සම්බන්ධයෙන් එල්ල වන විවේචන ප්රතික්ෂේප කර තිබේ. මීට පෙර විපක්ෂයේ සිටියදී හිටපු අගමැති ක්රිස් හිප්කින්ස් චීන සංචාරය සඳහා දෙවන යානයක් භාවිතා කිරීම දැඩි ලෙස විවේචනය කළ ලක්සන්, අගමැති වූ පසුද එම ක්රමයම අනුගමනය කිරීම දේශපාලන කතාබහට ලක්ව ඇත.
මෙම සංචාරය සඳහා නවප්රවෘත්ති කණ්ඩායම්, දූත පිරිස් සහ නිලධාරීන් 88 දෙනෙකු සහභාගී වී ඇති බව පෙන්වා දෙන ලක්සන්, පලාවු ප්රදේශයේ පවතින දුර බැහැර සහ සීමිත ගුවන් සේවා තත්ත්වයන් හේතුවෙන් ආරක්ෂක හමුදාව විසින් මෙම තීරණය ගත් බව සඳහන් කළේය. ඕස්ට්රේලියාවේ කර්න්ස් (Cairns) හි එක් යානයක් අමතරව රඳවා ඇත්තේ කිසියම් හදිසි තාක්ෂණික දෝෂයක් හෝ අපේක්ෂිත නොවන තත්ත්වයක් ඇති වුවහොත් පිරිස් ආරක්ෂිතව ආපසු ගෙන ඒම සඳහා බව ගුවන් සංරචක ආඥාපති, එයාර් කොමදෝරු ඇන්ඩි ස්කොට් ද තහවුරු කර තිබේ.
දේශපාලන විරුද්ධවාදීන්ගෙන් එල්ල වූ දැඩි දෝෂදර්ශනය
කෙසේ වෙතත්, ලේබර් පක්ෂයේ නායක ක්රිස් හිප්කින්ස් සඳහන් කර ඇත්තේ අගමැති ලක්සන් තමන්ගේ පහසුව අනුව සිය ස්ථාවරය වෙනස් කර ඇති බවත්, එය මහා කුහකත්වයක් බවත්ය. මීට අමතරව, ලේබර් පක්ෂයේ නියෝජ්ය නායක කර්මෙල් සෙපුලෝනි චෝදනා කළේ අගමැති ලක්සන් සහ විදේශ අමාත්ය වින්ස්ටන් පීටර්ස් අතර ඇති වූ මතභේදයක් නිසා ඔවුන් එකම යානයක ගමන් නොකර වෙනත් යානා යොදා ගත් බවට කටකතා පවතින බවයි. කෙසේ වෙතත්, එම චෝදනාව අසත්යයක්’ ලෙස බැහැර කළ වින්ස්ටන් පීටර්ස්, සමුළුවට සහභාගී වූ රටවල් සංඛ්යාව ඉහළ යාම සහ හදිසි අවස්ථා සඳහා ආරක්ෂක අංශ විසින් ගත් සාධාරණ තීරණයක් බව පැහැදිලි කළේය.
