ඉරාන යුද්ධය මධ්යයේ වුවද නවසීලන්තයට ඉන්ධන හිඟයකට මුහුණ දීමට සිදු නොවන බවට බලධාරීන්ගෙන් දැඩි විශ්වාසයක්!
ඉරාන යුද්ධය හේතුවෙන් ගෝලීය වශයෙන් දැඩි අවදානම් සහ අනපේක්ෂිත තත්ත්වයන් මතුව තිබුණද, මීට මාස හයකට පෙර හෝමූස් සමුද්ර සන්ධිය වසා දැමීමත් සමඟ ලෝකයේ වැඩිම බලපෑමකට ලක්විය හැකි රටක් වූ නවසීලන්තයට ඉදිරියේදී ඉන්ධන හිඟයකට මුහුණ දීමට සිදු නොවනු ඇතැයි රජයේ ඉන්ධන සහ බලශක්ති ප්රධානී ඉයන් කොසාර් (Iain Cossar) පවසා තිබේ. වෙළෙඳපොළ වේගයෙන් අනුවර්තනය වීම, විකල්ප සැපයුම් මාර්ග ක්රියාත්මක වීම සහ ගෝලීය වශයෙන් ඉන්ධන ඉල්ලුම පහත වැටීම හේතුවෙන් මෙරට ඉන්ධන සැපයුම් දාමය ස්ථාවරව පවත්වා ගැනීමට හැකි වී ඇති බව ඔහු පෙන්වා දෙයි.
ප්රධාන වශයෙන් ආසියාතික රටවලින් (කොරියාව, සිංගප්පූරුව, මැලේසියාව සහ ජපානය) පිරිපහදු කළ ඉන්ධන ආනයනය කරන නවසීලන්තය, සාමාන්යයෙන් රට තුළ දින 50ක පමණ ඉන්ධන තොගයක් පවත්වාගෙන යයි. යුද්ධය ආරම්භ වීමත් සමඟ අග්රාමාත්ය සහ අමාත්ය මණ්ඩල දෙපාර්තමේන්තුව යටතේ විශේෂ කාර්ය සාධක බලකායක් පිහිටුවා දෛනිකව තත්ත්වය සමාලෝචනය කළ අතර, නාවික ප්රවාහන බාධා මධ්යයේ වුවද ‘අඳුරු ගමන්’ (dark transits), නල මාර්ග සහ අමෙරිකානු හමුදා පරිවාර සේවාවන් හරහා තෙල් සැපයුම අඛණ්ඩව සිදුවී ඇත. ගෝලීය මිල ඉහළ යෑමේ බලපෑම මෙරටටද දැනෙනු ඇති නමුත්, නවසීලන්තයට අවශ්ය ඉන්ධන ලබා ගැනීමට මූල්යමය හැකියාව පවතින බැවින් බරපතළ සැපයුම් හිඟයක් ඇති නොවන බවට බලධාරීන් පූර්ණ විශ්වාසය පළ කරති.
