ඇන්සැක් දින විශේෂ උපදේශනය: අලුයම අනුස්මරණ මෙහෙයට (Dawn Service) සහභාගී වීමේදී ඔබ දැනගත යුතු දේ

විශේෂ වාර්තාව – දියත නිවුස් නිවුසීලන්තය (Diyatha News New Zealand)

ඕක්ලන්ඩ්, නිව්සීලන්තය — 2026 අප්‍රේල් 23 (අද) — යුද්ධයේදී මියගිය සහ දැනට සේවයේ නියුතු රණවිරුවන් අනුස්මරණය කරන මෙම උතුම් අවස්ථාවට සහභාගී වීමේදී පිළිපැදිය යුතු “දේ සහ නොකළ යුතු දේ” පිළිබඳ පොදු ගැටලුවලට RSA ප්‍රකාශිකා රේචල් රයිලි ලබා දුන් පිළිතුරු මෙන්න.

1. වේලාව සහ පැමිණීම

පැමිණිය යුතු වේලාව: සාමාන්‍යයෙන් මෙම මෙහෙයන් අලුයම 5.45 සිට 6.00 අතර ආරම්භ වේ. හමුදා සම්ප්‍රදායට අනුව මෙහෙය ආරම්භ වීමට මිනිත්තු 5 කට පෙරවත් එහි සිටීම වැදගත්ය.
ප්‍රමාද වී පැමිණීම: යම් හෙයකින් ඔබ ප්‍රමාද වුවහොත්, නිහඬව සහ ගෞරවනීය ලෙස පිරිස අතරට එක්වීමට බාධාවක් නැත.

2. ඇඳුම් පැළඳුම් සහ ඡායාරූප

ඇඳුම: මෙය හමුදා ආචාර සහිත අවමංගල්‍ය උත්සවයකට සමාන බැවින් පිළිවෙළකට හැඳ ඇඳීම වඩාත් සුදුසුය. එහෙත් සීතල අධික බැවින් උණුසුම් ඇඳුම් ඇඳීම අත්‍යවශ්‍යයි. යම් හෙයකින් ඔබට නිදි ඇඳුමෙන් (PJs) පැමිණීමට සිදු වුවද, සහභාගී නොවී සිටිනවාට වඩා පැමිණීම අගය කරනු ලැබේ.
හිස්වැසුම්: සීතලෙන් ආරක්ෂා වීමට හිස්වැසුම් (Beanies) පැළඳීමෙහි වරදක් නැත.
ඡායාරූප සහ සමාජ මාධ්‍ය: ඡායාරූප හෝ වීඩියෝ ලබා ගැනීම තහනම් නැත. එහෙත් අන් අයගේ දර්ශනයට බාධා නොවන ලෙසත්, ශබ්ද නගා කතා කරමින් බාධා නොවන ලෙසත් එය කළ යුතුය.

3. පදක්කම් පැළඳීම (Medals)

පවුලේ සාමාජිකයෙකුගේ පදක්කම්: ඔබේ මුත්තණුවන් හෝ පවුලේ කෙනෙකුගේ පදක්කම් පළඳින්නේ නම්, ඒවා ඔබගේ දකුණු පසින් පැළඳිය යුතුය.
තමන්ගේ පදක්කම්: ඔබ විසින්ම දිනාගත් පදක්කම් පළඳින්නේ නම්, ඒවා වම් පසින් පැළඳිය යුතුය.

4. මල් වඩම් තැබීම (Wreaths)

ඕනෑම අයෙකුට මල් වඩමක් තැබිය හැකිය. එහෙත් ඒ සඳහා පිළිවෙළක් ඇත. ප්‍රභූවරුන් සහ නිල කණ්ඩායම් මල් වඩම් තැබූ පසු, මහජනතාවට අවස්ථාව ලබා දෙනු ලැබේ. එවිට නිහඬව ඉදිරියට ගොස් මල් වඩම තබා, පියවරක් පසුපසට වී මොහොතක් ගෞරවය දක්වා නැවත පැමිණිය යුතුය.

5. දරුවන් සහ සුරතල් සතුන්

දරුවන්: කුඩා දරුවන් (Tamariki) මෙම අවස්ථාවට සහභාගී කරවා ගැනීම ඉතා වැදගත්ය. ඔවුන්ට නිහඬව සිටීමට අපහසු නම්, පිටුපසින් සිටීමට ඉඩ ලබා දීම වඩාත් සුදුසුය.
බල්ලන්: මනා හික්මවීමක් සහිත සුරතල් බල්ලන් එළිමහන් උත්සව සඳහා රැගෙන ඒමට අවසර ඇත.

6. සම්ප්‍රදායික ආහාර පාන

Gunfire Breakfast: ඇන්සැක් දින සම්ප්‍රදාය අනුව රණවිරුවන් රම් (Rum) ස්වල්පයක් මිශ්‍ර කළ කෝපි පානය කිරීමේ පුරුද්දක් ඇත. මෙහෙයෙන් පසු ඕනෑම අයෙකුට ප්‍රාදේශීය RSA මධ්‍යස්ථානයකට ගොස් ඔවුන් සමඟ කතාබහ කිරීමට අවස්ථාව ඇත.

දියත නිවුස් නිවුසීලන්ත විවරණය 🦁⚖️🌏

ඇන්සැක් දිනය යනු හුදු නිවාඩු දිනයක් පමණක් නොව, අප භුක්ති විඳින නිදහස වෙනුවෙන් ජීවිත පූජා කළ විරුවන් ස්මරණය කරන උතුම් දිනයකි. ඔබ අලුයම මෙහෙයට සහභාගී වීමට අපොහොසත් වුවහොත්, දිවා කාලයේ පවත්වන මෙහෙයන්ට හෝ යුද ස්මාරකයක් අසලට ගොස් පොපි (Poppy) මලක් තබා ගෞරව දැක්වීමට අමතක නොකරන්න.