සියවසක් පැරණි සංකීර්ණ ගණිත ගැටලුවලට විසඳුම් සොයාගත් චීන ජාතික ගණිතඥයන් දෙදෙනෙකුට කීර්තිමත් ‘ෆීල්ඩ්ස් පදක්කම’

දියත නිවුස් නිව්සීලන්තය (Diyatha News New Zealand)

නිව්යෝර්ක්, අමෙරිකාව — 2026 ජූලි 26 — ගණිත ක්ෂේත්‍රයේ නොබෙල් ත්‍යාගයට සමාන ලෙස සැලකෙන කීර්තිමත් ‘ෆීල්ඩ්ස් පදක්කම’ (Fields Medal) ප්‍රථම වතාවට දිනා ගැනීමට චීන ජාතික ගණිතඥයන් දෙදෙනෙකු වන හොං වැං (Hong Wang) සහ යු ඩෙං (Yu Deng) සමත්ව තිබේ.

වයස අවුරුදු 40ට අඩු විශිෂ්ට ගණිතඥයන් සඳහා වසර හතරකට වරක් පිරිනමන මෙම සම්මානය ඔවුන්ට හිමිවූයේ වසර සියයකට අධික කාලයක් තිස්සේ විසඳීමට නොහැකිව තිබූ සංකීර්ණ ගණිත ගැටලු දෙකක් සාර්ථකව විසඳීම හේතුවෙනි.

සම්මානලාභීන් සහ ඔවුන් විසඳූ ගැටලු

• හොං වැං (Hong Wang): අමෙරිකාවේ නිව්යෝර්ක් විශ්වවිද්‍යාලයේ සහ ප්‍රංශයේ IHES ආයතනයේ මහාචාර්යවරියක වන 35 හැවිරිදි හොං වැං, මෙම සම්මානය දිනාගත් ඉතිහාසයේ තෙවැනි කාන්තාව බවට පත්වෙමින් ඉතිහාසගත වූවාය. ඇය තම සගයා වන ජෝෂ් සාල් (Josh Zahl) සමඟ එක්ව 1917දී ජපාන ගණිතඥ සොයිචි කැකේයා ඉදිරිපත් කළ, ත්‍රිමාණ අවකාශයක් තුළ පැන්සලක් කැරකැවීමේදී එය අයත් කරගන්නා කුඩාම වර්ගඵලය පිළිබඳ ‘කැකේයා අනුමානය’ (Kakeya Conjecture) විසඳීමට සමත් වූවාය.
• යු ඩෙං (Yu Deng): චිකාගෝ විශ්වවිද්‍යාලයේ 37 හැවිරිදි මහාචාර්යවරයෙකු වන යු ඩෙං, 1900 වසරේදී ජර්මන් ගණිතඥ ඩේවිඩ් හිල්බට් විසින් ඉදිරිපත් කරන ලද අංශුවල චලනය පදනම් කරගනිමින් සමස්ත පද්ධතියක හැසිරීම ගණනය කිරීමේ ගැටලුව වන ‘හිල්බට්ගේ 6 වැනි ගැටලුව’ (Hilbert’s Sixth Problem) වායු වර්ගවල හැසිරීම ඇසුරෙන් විසඳීමට සමත්විය.
• සෙසු සම්මානලාභීන්: අමෙරිකාවේ පැවැති මෙම උත්සවයේදී මොවුන්ට අමතරව අමෙරිකාවේ ජෝන් පාඩන් (John Pardon) සහ කැනඩාවේ ජේකබ් ට්සිමර්මන් (Jacob Tsimerman) යන අයද මෙම පදක්කමෙන් පිදුම් ලැබූ අතර, එක් අයෙකුට කැනේඩියානුඩොලර් 15,000ක ත්‍යාග මුදලක් හිමිවිය.

මෙම ඓතිහාසික ජයග්‍රහණයත් සමඟ චීන සමාජ මාධ්‍ය තුළ දැඩි කතාබහක් ඇති වී ඇති අතර, ප්‍රංශ ජනාධිපති එමානුවෙල් මැක්‍රොන් ද හොං වැං වෙත දුරකථන ඇමතුමක් ලබා දෙමින් සිය සුභ පැතුම් එක් කර තිබේ.