ශ්රී ලංකාවේ අතීත මානව හිමිකම් උල්ලංඝනය කිරීම් සම්බන්ධයෙන් හියුමන් රයිට්ස් වොච් සංවිධානයෙන් නව වාර්තාවක් නිකුත් වෙයි!
කොළඹ, ශ්රී ලංකාව —
ශ්රී ලංකාවේ වත්මන් ආණ්ඩුව අතීතයේ සිදු වූ බරපතළ මානව හිමිකම් උල්ලංඝනය කිරීම් සහ අතුරුදන් කිරීම් සම්බන්ධයෙන් නීතිය ක්රියාත්මක කිරීමේදී අත්කරගෙන ඇත්තේ සුළු ප්රගතියක් පමණක් බව ‘හියුමන් රයිට්ස් වොච්’ (Human Rights Watch) සංවිධානය පවසයි. ශ්රී ලංකාව සම්බන්ධයෙන් මෑතකදී විශේෂ වාර්තාවක් නිකුත් කරමින් එම සංවිධානය මේ බව සඳහන් කර ඇත.
වින්දිතයින් 32 දෙනෙකු, අතුරුදන් වූවන්ගේ පවුල්වල සාමාජිකයන්, නීතිඥයින් සහ මානව හිමිකම් ක්රියාකාරීන් සමඟ පැවැත්වූ සාකච්ඡා, අධිකරණ ලේඛන සහ අනෙකුත් මූලාශ්ර පුළුල් ලෙස සමාලෝචනය කර මෙම වාර්තාව සකස් කර තිබේ. 1987-1989 ජවිපෙ කැරැල්ල සහ 2009 අවසන් වූ සිවිල් යුද්ධය අතරතුර ආරක්ෂක අංශ සහ සන්නද්ධ කණ්ඩායම් විසින් දස දහස් ගණනක් ජනතාව වධහිංසාවට ලක් කර, අතුරුදන් කර සහ ඝාතනය කර ඇති බව වාර්තාව පෙන්වා දෙයි. එසේම, 1990 ගණන්වල සිට විමර්ශන සඳහා කොමිෂන් සභා 10කට වඩා පත් කළද අතීත අපරාධ සම්බන්ධයෙන් යුක්තිය ඉටු කර ගැනීම අසාර්ථක වී ඇති බව එම සංවිධානය අවධාරණය කරයි.
චෙම්මනි සමූහ මිනීවල සහ ප්රධාන නඩු විභාගවල තත්ත්වය
චෙම්මනි සමූහ මිනීවලෙන් ඇටසැකිළි 580කට වැඩි ප්රමාණයක් හමුවීම හරහා අතීත බරපතළ මානව හිමිකම් කඩකිරීම් සම්බන්ධයෙන් විශ්වසනීය ස්වාධීන විමර්ශනයක දැඩි අවශ්යතාව යමරත් පෙන්නුම් කර ඇති බව හියුමන් රයිට්ස් වොච් සංවිධානය පෙන්වා දෙයි. වින්දිතයන්ගේ පවුල් දේශීය විමර්ශනවල විශ්වසනීයත්වය පිළිබඳ සැක පළ කරන අතර, 2006 වසරේ මුතුර්හිදී ‘ඇක්ෂන් අගේන්ස්ට් හන්ගර්’ මානුෂීය සහන සංවිධානයේ ස්වේච්ඡා සේවකයින් 17 දෙනෙකු ඝාතනය කර විසි වසරක් ගතවී තිබුණද ඊට සම්බන්ධ අයට දඬුවම් ලබා දීමේ කිසිදු ප්රගතියක් අත්කරගෙන නැත.
පාස්කු ඉරිදා ත්රස්ත ප්රහාරය, තරුණයින් 11 දෙනෙකු අතුරුදන් කිරීම, මාධ්යවේදී ප්රගීත් එක්නැලිගොඩ සහ ලසන්ත වික්රමතුංග ඝාතනය මෙන්ම කීත් නොයාර් පැහැරගෙන යාම ඇතුළු ප්රධාන සිදුවීම් කිහිපයක් සම්බන්ධයෙන් වත්මන් ආණ්ඩුව සුළු ප්රගතියක් පෙන්නුම් කළද, බොහෝ සිද්ධීන් සම්බන්ධයෙන් තවමත් නිසි පරිදි චෝදනා ගොනු කර නොමැති බවත් අවසන් නීතිමය ප්රතිඵල ලැබී නැති බවත් වාර්තාවේ වැඩිදුරටත් දැක්වෙයි.
