පුටින්ගේ වක්ර තර්ජන බ්රිතාන්යයට සහ බටහිර ලෝකයට එරෙහි රුසියානු මනෝවිද්යාත්මක මෙහෙයුමක කොටසක් – ස්ටීව් රොසෙන්බර්ග්ගේ විශ්ලේෂණයක්!
මොස්කව් සහ බිෂ්කෙක් —
බ්රිතාන්යය විසින් යුක්රේනයට අඛණ්ඩව ආයුධ සපයන පසුබිමක, රුසියානු ජනාධිපති ව්ලැඩිමීර් පුටින් විසින් බ්රිතාන්යයට එරෙහිව මෑතකදී නිකුත් කරන ලද ප්රකාශය බටහිර ලෝකයට එරෙහි පුළුල් මනෝවිද්යාත්මක උපායමාර්ගයක කොටසක් බව BBC රුසියානු කර්තෘ ස්ටීව් රොසෙන්බර්ග් පෙන්වා දෙයි. කර්ගිස්තානයේ බිෂ්කෙක් නුවරදී පැවති මාධ්ය හමුවකදී, බ්රිතාන්යයේ යුධ ඉලක්ක වෙත මොස්කව් ප්රහාර එල්ල කරන්නේද යන්න පිළිබඳව මාධ්යවේදියෙකු නැඟූ ප්රශ්නයකට පුටින් ලබා දුන්නේ “එය රහසක්. මිලිටරි රහසක්” යනුවෙන් කෙටි පිළිතුරකි. මෙම පිළිතුර ‘ඔව්’ හෝ ‘නැත’ යන කිසිවක් සනාථ නොකර බ්රිතාන්යය දැඩි අවිනිශ්චිතතාවකට සහ මානසික පීඩනයකට ලක් කිරීමේ අරමුණින් සිදුකළක් බව විස්තර කෙරේ.
කිර්ගිස්තානයේ පැවති මෙම මාධ්ය හමුව අමතමින් පුටින් බටහිර රටවල් දැඩි ලෙස විවේචනය කළ අතර, බටහිර ජාතීන් ‘මෝරුන්’ ලෙස හඳුන්වමින් දැඩි අනතුරු ඇඟවීමක් කළේය. “යමෙකු අපව ආහාර දාමයේ පහළට ඇද දැමීමට, ගිල ගැනීමට හෝ කා දැමීමට උත්සාහ කළහොත්, ඔවුන්ට දත්වලට පහරක් ලැබිය හැකිය” යනුවෙන් ඔහු සඳහන් කළේය. යුක්රේන යුද්ධය සම්බන්ධයෙන් රුසියාව දැඩි ස්ථාවරයක පසුවන අතර, යුද්ධය දීර්ඝ කාලයක් තිස්සේ පැවතුනද සතුරා අවසානයේ බිඳ වැටෙනු ඇති බවට ඔහු විශ්වාසය පළ කළේය.
ජර්මානු ඩ්රෝන ප්රහාර සහ අමෙරිකානු නියෝජිතයන් සමඟ සාකච්ඡා
මෙම තර්ජන බ්රිතාන්යයට පමණක් සීමා නොවී සමස්ත යුරෝපය වෙතම එල්ල වී ඇති බව පෙනෙන්නට තිබේ. මෑතකදී ජර්මනියේ ලයිප්සිග් ගුවන්තොටුපළට එල්ල වූ ඩ්රෝන ප්රහාරය පිටුපස රුසියාව සිටින බව ජර්මනිය හෙළිදරව් කර ඇති අතර, එය යුරෝපය තුළ රුසියාව ක්රියාත්මක කරන දෙමුහුන් මෙහෙයුම්වල (Hybrid operations) රටාවක් බව ජර්මානු අභ්යන්තර කටයුතු අමාත්ය අලෙක්සැන්ඩර් ඩොබ්රින්ඩ් පවසා ඇත.
කෙසේ වෙතත්, යුක්රේන ගැටුම අවසන් කිරීම සඳහා සාකච්ඡා පැවැත්වීමට තවදුරටත් විවෘතව සිටින බව පවසා ඇති පුටින්, අමෙරිකානු ජනාධිපති ඩොනල්ඩ් ට්රම්ප්ගේ විශේෂ නියෝජිතයන් වන ජෙරඩ් කුෂ්නර් සහ ස්ටීව් විටකොෆ් සමඟ වැඩ කිරීමට තමා දැඩි කැමැත්තෙන් පසුවන බව අවධාරණය කර තිබේ. තමන් හොඳින් දන්නා සහ විශ්වාස කරන එම පුද්ගලයන් සමඟ ඉදිරියේදී සාකච්ඡා පැවැත්වීම සතුටට කරුණක් වනු ඇති බව ඔහු වැඩිදුරටත් සඳහන් කළේය.
