තිරසාර ආහාර පද්ධති පිළිබඳ ශ්රී ලංකාවේ පාරම්පරික ඥානයෙන් ලොවට වැදගත් පාඩමක් ඉගෙනීමට හැකියි – අග්රාමාත්ය ආචාර්ය හරිනි අමරසූරිය භූතානයේදී පවසයි!
භූතානය සහ කොළඹ, ශ්රී ලංකාව —
තිරසාර ආහාර පද්ධති පිළිබඳ ශ්රී ලංකාවේ පාරම්පරික ඥානයෙන් වර්තමාන ලෝකයට ඉතා වැදගත් පාඩම් රැසක් ඉගෙන ගැනීමට හැකි බව අග්රාමාත්ය ආචාර්ය හරිනි අමරසූරිය මෙනවිය පෙන්වා දී තිබේ. භූතානයේ සංචාරයක නිරත අග්රාමාත්යවරිය මෙම අදහස් පළ කළේ “සවිඥානික ආහාර පද්ධති පිළිබඳ ගෝලීය සමුළුව” (Conscious Food Systems Global Summit) අමතමින් ප්රධාන දේශනය පවත්වමිනි.
“අර්බුදවලට මුහුණ දීම සඳහා සවිඥානිකව නැඟී සිටීම” යන අභියෝගාත්මක තේමාව යටතේ භූතානයේ ඩුන්ග්කාර්ඩ්සොං හිදී මෙම ජාත්යන්තර සමුළුව ඉතා උත්කර්ෂවත් අයුරින් පැවැත්විණි. 2026 සවිඥානික ආහාර පද්ධති පිළිබඳ ගෝලීය සමුළුව යනු තිරසාර, සාධාරණ සහ පුනර්ජනනීය ආහාර පද්ධති ඉදිරියට ගෙනයෑම සඳහා දැනුවත්භාවය, සමාජ වටිනාකම්, සංස්කෘතිය, අධ්යාත්මිකත්වය සහ අභ්යන්තර පරිවර්තනයේ කාර්යභාරය පිළිබඳ දැඩි අවධානයක් යොමු කරමින් පවත්වනු ලබන වැදගත් ගෝලීය සමුළුවකි. භූතාන රජය සහ එක්සත් ජාතීන්ගේ සංවර්ධන වැඩසටහන (UNDP) ඒකාබද්ධව මෙම සමුළුව ඉතා සාර්ථක ලෙස සංවිධානය කර තිබිණි.
සොබාදහම සමඟ බැඳී පවතින ශ්රී ලංකාවේ පාරම්පරික උරුමය
මෙම සමුළුව අමතමින් විශේෂ දේශනයක් කළ අග්රාමාත්ය ආචාර්ය හරිනි අමරසූරිය මෙනවිය සඳහන් කළේ, ශ්රී ලංකිකයින් පරම්පරා ගණනාවක් පුරා ආහාර නිෂ්පාදනයේ ආරම්භයේ සිට ඒවා ගබඩා කිරීම, ආරක්ෂාකාරීව සංරක්ෂණය කිරීම සහ පරිභෝජනය කිරීම දක්වා සෑම අදියරකදීම සොබාදහම සමඟ අන්යෝන්ය සහයෝගයෙන් කටයුතු කිරීමේ වැදගත්කම මනාව අවබෝධ කරගෙන සිටි බවයි. වර්තමාන ගෝලීය අර්බුද හමුවේ එවැනි දේශීය ඥානයන් සුරක්ෂිත කර ගැනීම අත්යවශ්ය කරුණක් බව ඇය අවධාරණය කළාය.
ගෝලීය ආහාර සුරක්ෂිතතාව සහ පාරිසරික අභියෝග ජය ගැනීම පිණිස මෙරට පාරම්පරික සංස්කෘතික වටිනාකම් ජාත්යන්තර වේදිකාවට රැගෙන යාම පිළිබඳව ශ්රී ලාංකිකයකු ලෙස තමන් දැඩි ආඩම්බරයට පත්වන බවද අග්රාමාත්යවරිය වැඩිදුරටත් ප්රකාශ කළාය. ලෝක ප්රජාවගේ දැඩි අවධානයට ලක් වූ මෙම සමුළුව හරහා ශ්රී ලංකාවේ කීර්තිනාමය තවත් ඉහළ නැංවීමට මෙන්ම ජාත්යන්තර සබඳතා තවදුරටත් ශක්තිමත් කර ගැනීමටත් මහඟු අවස්ථාවක් උදා වී තිබේ.
