ශ්රී ලංකාවේදී ඉන්දියාවේ ආරක්ෂක අභිමතයන්ට විරුද්ධ කිසිදු ක්රියාකාරකමකට ඉඩ නොදෙන බව ජනාධිපතිවරයා අවධාරණය කරයි!
ඉන්දියාවේ ආරක්ෂක අභිමතයන්ට විරුද්ධ කිසිදු ක්රියාකාරකමකට ශ්රී ලංකා භූමිය කිසිවිටෙකත් භාවිතා කිරීමට ඉඩ නොදෙන බව ශ්රී ලංකා ජනාධිපති අනුර කුමාර දිසානායක මහතා තරයේ අවධාරණය කර තිබේ. තෙදින නිල සංචාරයක් සඳහා ශ්රී ලංකාවට පැමිණි ඉන්දීය ආරක්ෂක අමාත්ය රාජ්නාත් සිං සහ ජනාධිපති අනුර කුමාර දිසානායක මහත්වරු අතර කොළඹ ජනාධිපති කාර්යාලයේදී පැවති ද්විපාර්ශ්වික සාකච්ඡාවලදී මෙම වැදගත් ප්රකාශය සිදු කර ඇත. වසර 38කට පසු ඉන්දීය ආරක්ෂක අමාත්යවරයෙකු ශ්රී ලංකාවේ නිල සංචාරයක නිරත වන ප්රථම අවස්ථාව මෙය වන අතර, දෙරට අතර අන්යෝන්ය විශ්වාසය මත පදනම් වූ ඓතිහාසික සබඳතා තවදුරටත් වර්ධනය කර ගැනීමට මෙහිදී නායකයින් එකඟ වී තිබේ.
මෙම සංචාරය අතරතුරදී ශ්රී ලංකාව සහ ඉන්දියාව අතර ආරක්ෂක සහයෝගීතාව තවදුරටත් ශක්තිමත් කරමින් ගිවිසුම් තුනකට අත්සන් තබා ඇති අතර, ගුවන් හමුදා අවි ආයුධ වැඩිදියුණු කිරීම මෙන්ම ජාතික ආරක්ෂක විද්යාල සහ ආදී ශිෂ්ය සංගම් අතර සහයෝගීතාව ඇති කර ගැනීම ඒ අතර වේ. මීට අමතරව, ‘දිට්වා’ සුළි කුණාටු සමයේදී ඉන්දියාව විසින් ‘සාගර් බන්ධු’ මෙහෙයුම යටතේ ලබා දුන් මානුෂීය සහන සහ පුනරුත්ථාපන ආධාර වෙනුවෙන් ශ්රී ලංකා ජනාධිපතිවරයා මෙහිදී සිය හෘදයාංගම කෘතඥතාව පළ කළේය. ඉන්දීය ආරක්ෂක අමාත්යවරයා සඳහන් කළේ ආසන්නතම අසල්වැසියා සහ මිතුරා ලෙස ශ්රී ලංකාවට අවශ්ය ඕනෑම අර්බුදකාරී අවස්ථාවකදී පළමු ප්රතිචාර දක්වන්නා වශයෙන් සහයෝගය ලබාදීම තම වගකීමක් ලෙස සලකන බවයි. ජනාධිපතිවරයා හමුවීමෙන් අනතුරුව ඉන්දීය ආරක්ෂක අමාත්යවරයා අග්රාමාත්ය ආචාර්ය හරිනි අමරසූරිය සහ විපක්ෂ නායකවරයා ද හමුවී සාකච්ඡා පවත්වන ලදී.
